హైదరాబాద్: తెలంగాణ రాష్ట్ర ముఖ్యమంత్రి రేవంత్ రెడ్డి గారికి బీఆర్‌ఎస్ వర్కింగ్ ప్రెసిడెంట్ కేటీఆర్ బుధవారం ఓ లేఖ రాశారు. “ఫార్ములా–ఈ రేస్” పై రాష్ట్ర ప్రభుత్వం చేస్తున్న నిరాధార ఆరోపణలు, అసత్య ప్రచారాలపై కేటీఆర్ తీవ్ర ఆగ్రహం వ్యక్తం చేశారు. కాంగ్రెస్ పార్టీ రాష్ట్రంలో కక్ష సాధింపు చర్యల్లో భాగంగా ఈ అంశంపై అబద్ధాలు ప్రచారం చేస్తున్నట్లు ఆరోపిస్తూ, ఈ అంశం పై అసెంబ్లీలో సవివరమైన చర్చ జరగాలని కోరారు.
కేటీఆర్, అసెంబ్లీ వేదికపై చర్చ జరగడం ద్వారా ఈ అంశంలో న్యాయం జరుగుతుందని, ప్రజలకు నిజాలు తెలియాలన్నారు. “మీరు నాలుగు గోడలలో చర్చలు జరపడం కన్నా, అసెంబ్లీలో జరిగిన చర్చతో ప్రజలు ఏం జరిగిందో తెలుసుకోవచ్చు,” అని ఆయన తన లేఖలో పేర్కొన్నారు. తెలంగాణకు, హైదరాబాద్‌కు మంచి జరగాలనే ఉద్దేశంతో గత ప్రభుత్వం “ఫార్ములా–ఈ” రేస్ నిర్వహించుకున్నట్లు, దానివల్ల రాష్ట్ర ఆర్థిక వ్యవస్థకు సుమారు రూ.700 కోట్ల లాభం చేకూరిందని కేటీఆర్ స్పష్టం చేశారు.
అయితే, 2024లో రేస్ జరగాల్సిన సమయంలో కొత్తగా అధికారంలోకి వచ్చిన కాంగ్రెస్ ప్రభుత్వం ఈ రేసును రద్దు చేసినట్లు ఆయన తెలిపారు. ఈ నేపథ్యంలో, సాంఘిక, రాజకీయ కక్షలపై విమర్శలు చేస్తూ, నిజాలేమిటో తెలుసుకునే హక్కు ప్రజలకు ఉందని కేటీఆర్ చెప్పారు. ఆయన, ఈ అంశంపై శాసనసభలో చర్చ జరగాలని డిమాండ్ చేస్తూ, స్పీకర్ గడ్డం ప్రసాద్‌కుమార్‌కు కూడా వినతిపత్రం అందజేశారు
