మద్రాస్ హైకోర్టు ఓ చారిత్రక తీర్పు ఇచ్చింది. భర్త మరణానంతరం పునర్వివాహం చేసుకున్న మహిళ కూడా తన మొదటి భర్త ఆస్తిలో సమాన హక్కు పొందే అర్హత కలిగి ఉందని స్పష్టం చేసింది. తమిళనాడులో సేలం జిల్లా మహిళ మల్లిక ఈ తీర్పు ద్వారా న్యాయపరంగా విజయం సాధించింది.
మల్లిక భర్త చిన్నయ్యన్ మరణానంతరం ఆమె మరో వివాహం చేసుకున్నారు. అయితే చిన్నయ్యన్ కుటుంబ సభ్యులు ఆమెకు ఆస్తి పంచడాన్ని నిరాకరించారు. దీనితో మల్లిక స్థానిక కోర్టును ఆశ్రయించగా, ఆ కోర్టు ఆమెకు ప్రతికూలంగా తీర్పు వెలువరించింది. నిరాశ చెందిన మల్లిక హైకోర్టుకు వెళ్లారు.
విచారణ సందర్భంగా, 1955 హిందూ వివాహ చట్టం ప్రకారం, పునర్వివాహం చేసినప్పటికీ, మొదటి భర్త ఆస్తిలో మహిళకు సమాన హక్కు ఉంటుందని మల్లిక తరఫు న్యాయవాది వాదనలు వినిపించారు. ఈ వాదనలపై గౌరవనీయ న్యాయమూర్తులు జస్టిస్ సుబ్రమణియన్, జస్టిస్ కుమరప్పన్ ధర్మాసనం స్పందిస్తూ, పునర్వివాహం కారణంగా మహిళ హక్కులను కోల్పోవడం తప్పు అని పేర్కొన్నారు.
2005లో రద్దయిన పాత నిబంధనలను ప్రస్తావిస్తూ, హైకోర్టు మహిళలకు పురుషులతో సమానంగా ఆస్తి హక్కులు ఉండాలని నొక్కి చెప్పింది. సమాజంలో సమానత్వం పాటించాల్సిన అవసరాన్ని హైకోర్టు ఈ తీర్పుతో స్పష్టం చేసింది.
