హాలీవుడ్ ప్రతిష్టాత్మక చిత్రం “ముఫాసా: ది లయన్ కింగ్”కు టాలీవుడ్ సూపర్ స్టార్ మహేష్ బాబు తెలుగు వెర్షన్‌లో డబ్బింగ్ చెప్పడం విశేషం. ఈ సందర్భంగా మహేష్ బాబు కుమార్తె సితార ఓ ప్రత్యేక వీడియో విడుదల చేసింది. “ముఫాసా” పాత్రకు తన తండ్రి వాయిస్ ఇవ్వడం పట్ల ఆమె గర్వం వ్యక్తం చేయడమే కాకుండా, మహేష్ బాబు నిజ జీవితంలోనూ ముఫాసా వంటి ప్రేమతో మరియు అండతో ఉంటారని తెలిపింది.
సితార మాట్లాడుతూ, “నాన్నకు ముఫాసా పాత్ర వాయిస్ ఇవ్వడం నాకు చాలా గర్వంగా అనిపించింది. ముఫాసా పాత్ర అత్యంత ఐకానిక్, అందులో మా నాన్న వాయిస్ మరింత అందజేస్తుంది. మా నాన్న నిజ జీవితంలోనూ ముఫాసా లాంటి వ్యక్తి. నమ్మకం, ప్రేమ, మరియు అండగా ఉండడం అతని లక్షణాలు” అని పేర్కొంది.
ఈ నెల 20న ఈ చిత్రం థియేటర్లలో విడుదల కానుండగా, సితార వీడియోలో ప్రేక్షకులను సినిమాను తప్పక చూడాలని ఆహ్వానించింది. “ట్రైలర్ చూసినప్పటి నుంచి నేను ఈ సినిమా కోసం ఎంతో ఆసక్తిగా ఎదురు చూస్తున్నాను. ఇది ఒక అద్భుతమైన అనుభవం అవుతుంది” అని సితార పేర్కొంది.
మహేష్ బాబు డబ్బింగ్ ఇస్తున్న “ముఫాసా” చిత్రం క్రిస్మస్ కానుకగా విడుదల కానుండటంతో, సినీ అభిమానులలో ఆసక్తి పెరిగింది.
Tags:
