హైదరాబాద్: సిరియాలో తీవ్ర అంతర్యుద్ధ పరిస్థితులు తలెత్తడంతో భారత విదేశాంగ శాఖ భారత పౌరులకు కీలక హెచ్చరిక జారీ చేసింది. శుక్రవారం అర్ధరాత్రి విడుదల చేసిన అడ్వైజరీలో, సిరియాలో ఉన్న భారతీయులు తక్షణమే ఆ దేశాన్ని వీడాలని సూచించింది. అలాగే, తదుపరి నోటిఫికేషన్ వరకు సిరియాకు ప్రయాణం చేయవద్దని కోరింది. ‘‘సిరియాలో ప్రస్తుతం నెలకొన్న అస్థిర పరిస్థితుల దృష్ట్యా, ఆ దేశంలో ఉన్న భారత పౌరులు అందుబాటులో ఉన్న విమానాలు లేదా ఇతర రవాణా మార్గాల ద్వారా వెంటనే సిరియాను విడిచిపెట్టాలి. అత్యవసర సహాయం కోసం డమాస్కస్‌లోని భారత రాయబార కార్యాలయాన్ని సంప్రదించండి. హెల్ప్‌లైన్ నంబర్ +963993385973 లేదా ఈ-మెయిల్ [email protected] ద్వారా సహాయాన్ని పొందవచ్చు,’’ అని కేంద్రం స్పష్టం చేసింది.
సిరియాలో తిరుగుబాటు దళాలు తీవ్ర తాకిడి చేస్తుండటంతో ప్రభుత్వం పూర్తిగా అసహాయంగా మారిపోయింది. బషర్ అల్-అస్సాద్ నేతృత్వంలోని ప్రభుత్వ దళాలపై తిరుగుబాటుదారులు పలు కీలక పట్టణాలను ఆక్రమించారు. రాజధాని డమాస్కస్ మీద ఆధిపత్యం పొందడమే తిరుగుబాటుదారుల తదుపరి లక్ష్యంగా కనిపిస్తోంది.సిరియాలో భారతీయుల భద్రతకు ప్రాధాన్యతను ఇచ్చిన కేంద్రం, అత్యవసర పరిస్థితుల్లో ఎంబసీ సహకారం పొందడం తప్పనిసరిగా సూచించింది. ‘‘ప్రస్తుతం పరిస్థితులు అత్యంత ప్రమాదకరంగా మారాయి. అవసరం లేకపోతే బయటకు వెళ్లకండి. సురక్షితంగా ఉండటానికి అన్ని జాగ్రత్తలు తీసుకోండి,’’ అని విదేశాంగ శాఖ పేర్కొంది.
