మోటారు వాహన చట్ట నిబంధనలు ఉల్లంఘించిన వాహనదారులకు గట్టి హెచ్చరికలు జారీ చేయాలని ఆంధ్రప్రదేశ్ హైకోర్టు స్పష్టం చేసింది. రహదారులపై జరుగుతున్న ప్రమాదాలను అరికట్టేందుకు ట్రాఫిక్‌ నిబంధనలు కఠినంగా అమలు చేయాలని, చలాన్లు చెల్లించనివారి వాహనాలను సీజ్‌ చేయాలని కోర్టు సూచించింది.
బుధవారం హైకోర్టు ధర్మాసనం ఈ అంశంపై విచారణ జరిపింది. ప్రధాన న్యాయమూర్తి జస్టిస్‌ ధీరజ్‌సింగ్‌ ఠాకుర్‌, జస్టిస్‌ చీమలపాటి రవితో కూడిన ధర్మాసనం పోలీసులు నిబంధనలను అమలు చేయడంలో ప్రాథమిక వైఫల్యం చూపుతున్నారని అభిప్రాయపడింది. హెల్మెట్‌ ధరించకపోవడం వల్ల మూడు నెలల కాలంలో 667 మంది మృతిచెందారని పేర్కొంటూ హైకోర్టు తీవ్ర ఆందోళన వ్యక్తం చేసింది.
అంతేకాకుండా, చలాన్లు 90 రోజుల్లో చెల్లించకుంటే వాహనాలను సీజ్‌ చేయాలని సెక్షన్‌-167 ప్రకారం అమలు చేయాలని ఆదేశించింది. సెక్షన్‌-206 ప్రకారం చట్ట ఉల్లంఘనకారుల లైసెన్సులను రద్దు చేయాలని సూచించింది. పోలీసుల ఉత్సాహం లేకపోవడం వల్లే రోడ్లపై నిబంధనల ఉల్లంఘనలు పెరిగిపోతున్నాయని హైకోర్టు అభిప్రాయపడింది.
