హైదరాబాద్ ఆర్టీసీ క్రాస్ రోడ్స్ లోని సంధ్య థియేటర్ వద్ద పుష్ప 2: ది రూల్ బెనిఫిట్ షో సందర్భంగా డిసెంబర్ 4న రాత్రి చోటు చేసుకున్న తొక్కిసలాట ఘటన తీవ్ర విషాదానికి దారితీసింది. ఈ ఘటనలో దిల్‌సుఖ్‌నగర్‌కు చెందిన రేవతి (39) అనే మహిళ ప్రాణాలు కోల్పోగా, ఆమె కుమారుడు శ్రీతేజ్ (9) తీవ్రంగా గాయపడి ప్రస్తుతం నిమ్స్ ఆసుపత్రిలో చికిత్స పొందుతున్నాడు.
ఈ ఘటనపై రేవతి కుటుంబసభ్యుల ఫిర్యాదు మేరకు కేసు నమోదు చేసిన పోలీసులు సంధ్య థియేటర్ యాజమాన్యంపై చర్యలు చేపట్టారు. థియేటర్ యజమాని సందీప్‌తో పాటు మేనేజర్, సెక్యూరిటీ మేనేజర్‌ను ఆదివారం అరెస్ట్ చేసి జ్యుడిషియల్ రిమాండ్‌కు తరలించారు. తొక్కిసలాటకు థియేటర్ యాజమాన్యం నిర్లక్ష్యమే కారణమని పోలీసులు పేర్కొన్నారు.
ఇక ఈ విషాదంపై టాలీవుడ్ స్టార్ అల్లు అర్జున్ స్పందిస్తూ, రేవతి కుటుంబానికి రూ. 25 లక్షల ఆర్థిక సహాయం ప్రకటించారు. “రేవతి కుటుంబానికి ప్రగాఢ సానుభూతి. ఆమె లేని లోటు తీర్చలేము. వారి కుటుంబానికి నా తారఫున ఎలాంటి సాయం చేయడానికైనా సిద్ధంగా ఉంటాను,” అంటూ తన ఆవేదనను తెలియజేశారు.
తాజాగా ఈ ఘటనపై తెలంగాణ పోలీసులు థియేటర్ మూసివేతకు సిఫార్సు చేసినట్లు సమాచారం. ఇకపై ఈ తరహా ఘటనలు పునరావృతం కాకుండా ప్రభుత్వ చర్యలు తీసుకుంటుందని స్పష్టం చేశారు.
పుష్ప 2 విజయం
మరోవైపు పుష్ప 2: ది రూల్ భారీ వసూళ్లు సాధిస్తూ సినీ పరిశ్రమలో చరిత్ర సృష్టిస్తోంది. విడుదలైన మూడు రోజుల్లోనే ఈ సినిమా రూ. 621 కోట్ల గ్రాస్ వసూళ్లు రాబట్టిందని నిర్మాతలు ప్రకటించారు. అయితే, ఈ ఘనత వెనుక ఇలా విషాద ఘటన చోటు చేసుకోవడం అభిమానులను ఆందోళనకు గురి చేసింది.
ఇది అల్లు అర్జున్ అభిమానులకు చేదు అనుభవంగా మిగిలింది. ఈ సంఘటనతో ప్రభుత్వం, థియేటర్ యాజమాన్యం భద్రతా చర్యలు పటిష్టం చేయాలని ప్రత్యేక దృష్టి సారించింది.
