రాజమండ్రి రైల్వే స్టేషన్‌ను ఆధునిక వసతులతో తీర్చిదిద్దేందుకు కేంద్ర ప్రభుత్వం రూ.271.43 కోట్ల నిధులు కేటాయించింది. 2027లో నిర్వహించనున్న గోదావరి పుష్కరాల నేపథ్యంలో ఈ నిధులు మంజూరు చేయడం జరిగింది. పుష్కరాల సమయంలో లక్షలాది భక్తులు తరలి రానున్న నేపథ్యంలో ఈ అభివృద్ధి పనులకు ప్రాధాన్యత ఇవ్వబడింది.
విజయవాడ రైల్వే డివిజన్ పరిధిలో ఉన్న రాజమండ్రి రైల్వే స్టేషన్ ఎంతో ముఖ్యమైనదిగా భావించబడుతుంది. ప్రస్తుతం ఈ స్టేషన్ ద్వారా గంటకు 9,533 మంది ప్రయాణికులు రాకపోకలు నిర్వహిస్తున్నట్లు అంచనా. గతంలో అమృత్ భారత్ స్టేషన్ పథకం కింద రూ.250 కోట్లతో టెండర్లు ఆమోదించబడ్డాయి. అయితే పుష్కరాల ప్రత్యేక అవసరాల దృష్ట్యా మరిన్ని నిధులు చేర్చడం జరిగింది.
రాజమండ్రి రైల్వే స్టేషన్ అభివృద్ధిలో భాగంగా ప్లాట్‌ఫామ్‌లను అనుసంధానించే పాదచారుల వంతెనలు, అదనపు ప్లాట్‌ఫామ్‌లు, భక్తుల కోసం ప్రత్యేక సదుపాయాలు కల్పించనున్నారు. రైల్వే శాఖ ఇటీవల ప్రణాళికలపై సమీక్షించి, పునరుద్ధరణ పనులకు అనుమతి మంజూరు చేసింది.
